ជីវិតមិនអាចរស់នៅដោយគ្មានក្តីស្រមៃបានទេ!
ការស្រមើស្រមៃពុំមែនជាការពិតនោះទេ ក៏ប៉ុន្តែវាគឺជាមូលដ្ឋានគ្រឹះនៃការពិតទាំងឡាយដែលយើងឃើញនាពេលបច្ចុប្បន្ន។ អ្វីៗដែលសង្គមរបស់យើងកំពុងមាននាពេលសព្វថ្ងៃ គឺសុទ្ធតែកើតឡើងចេញពីការស្រមើស្រមៃ។ វាបាននិងកំពុងតែរុញកង់សង្គមមនុស្សទៅមុខជានិច្ច។ ដរាបណាដែលសង្គមមនុស្សនៅតែមានក្តីស្រមៃ ការរីកចម្រើននឹងនៅតែកើតឡើងដោយមិនជិនណាយឡើយ។ តើហេតុអ្វីយើងត្រូវមានការស្រមើស្រមៃជានិច្ច ទោះបីយើងកំពុងបរាជ័យ កំពុងជាប់គាំងក្នុងឧបសគ្គ ឬកំពុងមានវ័យចំណាស់ទៅហើយនោះ?
ទីមួយ ការស្រមើស្រមៃអាចធ្វើឱ្យយើងនៅក្មេងជានិច្ច។ ប្រសិនបើអ្នកមើលត្រឡប់ទៅក្រោយវិញ កាលពីក្មេង អ្នកមានការស្រមើស្រមៃមិនតិចនោះទេ។ ការស្រមើស្រមៃគឺជាកត្តាមួយដែលបង្ហាញថាអ្នកចង់លូតលាស់ ចង់ចម្រើន ចង់ធំធាត់។ ពេលយើងនៅក្មេង ចន្លោះដើម្បីលូតលាស់ទៅមុខគឺមានទំហំធំធេង ដូច្នេះទើបយើងបង្កើតការស្រមើស្រមៃដើម្បីចង់បំពេញចន្លោះដ៏ធំធេងនោះ។ ប៉ុន្តែនៅពេលយើងមានអាយុកាន់តែច្រើន យើងគិតថាខ្លួនចាស់ហើយ គិតថាខ្លួនមានពេលតិចដើម្បីរស់បន្តទៀត ដូច្នេះយើងក៏លែងហ៊ានស្រមើស្រមៃដូចមុនទៀត។ ការឈប់ស្រមៃ គឺជាសញ្ញាដែលបង្ហាញថា អ្នកទទួលស្គាល់ថាខ្លួនចាស់។ ដូចនេះ ចូរធ្វើការស្រមើស្រមៃបន្តទៀត ដោយមិនចាំបាច់ត្រូវខ្វល់ពីអាយុរបស់អ្នក។ ឱ្យតែអ្នកនៅតែស្រមើស្រមៃពីអនាគតដ៏អស្ចារ្យ អ្នកនៅតែក្មេងជានិច្ច។
ទីពីរ ក្តីស្រមៃអាចធ្វើឱ្យអ្នករស់រវើក។ ការបាត់បង់ក្តីស្រមៃ គឺប្រៀបដូចជាការបាត់បង់សិល្បៈមួយដែលធ្លាប់តែផ្តល់រសជាតិឱ្យជីវិត។ ទោះបីជាអ្នកកំពុងជួបស្ថានភាពសោះកក្រោះក្នុងជីវិតក៏ដោយ តែអ្នកនៅតែអាចស្រមើស្រមៃមើលជីវិតដ៏អស្ចារ្យនាពេលអនាគត។ ការស្រមើស្រមៃអាចធ្វើឱ្យអ្នកមានសេរីភាព និងមានក្តីសង្ឃឹមចំពោះអនាគត។ អ្នករស់នៅក្នុងបច្ចប្បន្នភាពប្រកបដោយស្មារតីរស់រវើក ក៏ព្រោះតែអ្នកមានក្តីសង្ឃឹមថានឹងទទួលបានជីវិតដ៏អស្ចារ្យមួយនាពេលខាងមុខ។
ទីបី ការស្រមើស្រមៃអាចធ្វើឱ្យអ្នកទទួលភាពជោគជ័យបានកាន់តែច្រើន។ ក្តីស្រមៃគឺជាសញ្ញាដែលបង្ហាញថាអ្នកចង់បានបន្ថែមទៀត។ ឱ្យអ្នកតែអ្នកនៅតែបន្តចង់បាន ភាគច្រើនអ្នកនឹងទទួលវាបានកាន់តែច្រើនទៅតាមនោះដែរ ព្រោះវាជាក្តីសង្ឃឹមដែលធ្វើអ្នកចាប់ផ្តើមសកម្មភាពដើម្បីសម្រេចវា។
សូមកុំឈប់ស្រមើស្រមៃក៏ព្រោះតែអ្នកបរាជ័យ ជាប់គាំងក្នុងជីវិត ឬក៏ព្រោះតែអ្នកមានវ័យចំណាស់ឱ្យសោះ។ ការស្រមើស្រមៃ គឺជាសេរីភាព ហើយគ្រប់គ្នាអាចធ្វើវាបាន។ ឱ្យតែអ្នកនៅមានការស្រមើស្រមៃ ជីវិតអ្នកក៏នឹងនៅតែរស់រវើកប្រកបដោយក្តីសង្ឃឹមជានិច្ច។ ការស្រមើស្រមៃ អាចលើកកម្លាំងចិត្តអ្នកបានគ្រប់វិនាទី។
នីពន្ធ ៖ ដោ នីដា
ដោ នីដា(Dor Nida) 
Leave a comment